من أقوال القدّيس شربل
عم تركضوا تا تأمنوا مستقبلكم ومستقبل لاولادكم. تذكّروا دايماً انو مستقبلكم مش هو آخر ايامكم بهالعالم. لكن هو اول يوم بالعالم الاخر… بتأمنو مستقبل اولادكم لما بتأمنولن السما
اذا انتو ما تقدستوا … كيف بتقدسوا اولادكم؟ أذا المسيح مش فيكم كيف بتعطوه لاولادكم؟
اذا ما اعطيتوهم المسيح، كل شي غيرو بتقدمولن اياه عقيم وزايل
مش بالمسكن العالي وضمانات هالعالم بتعطوا اولادكم الامان والمستقبل. اعطوهم قداستكم وصلواتكم، بتكفلوا امانهم بهالعالم ومستقبلهم بالعالم الثاني. النجاح بالحياة هو الوقوف امام الله دون خجل
اعملوا الخير دون كلل. ما تسعوا ورا الراحة. الراحة خطر كبير عليكم
انتبهوا منيح : قد ما تكون التجربة مغرية، ما بتبرر الخطية
الله خلقكم تا تتقدسوا مش تا تموتوا
كل شيء بيجمع عالخير بيكون من الله وكل شيء بيقسم وبيفرق بيكون من الشيطان
الشيطان بيضحّك الانسان بالاول تا يبكيه بالاخر
السلاح الاساسي ضد الشيطان هو التواضع والصدق
البشر بيفتشوا على آيات تا يشفوا ويأمنوا . وعلى طريق تا يمشوا ويوصلوا للخلاص والسعادة
الاية هي القربان. العلامة هي الصليب. الرسالة هي الانجيل. الخلاص بالكنيسة
اعظم واهم آية هي القربان المقدس: جسد المسيح القائم من الموت
القداسة هي هدفكم. الكمال بالمحبة غايتكم النهائية. ما تتوقفوا عند وسائل القداسة وتعبدوها
الصلاة تا تقدسكم : ما تقدسوا الصلاة. ما تخلوا الصلاة تكون وسيلتكم لغايات ثانية. ما تستبدلوا المسيح بالكلام عن المسيح بتصيروا تعبدوا كلامكم
بقوة الروح اللي بتستمدها بصلاتك، حوّل كل اللي بيدخل عليك وما بتملك منو شي لقداسة بتطلع منك وبتملكك كل شيء
ما تهربوا من ذاتكم تا تروحوا عند الله. الله بدو ياكم تقدمولو ذاتكم متل ما هي تا يرفعها ويقدسها
الكلمة اللي ما بتبني بلاها. ما تحكي الا وقت اللي بيكون كلامك اعمق وابلغ من صمتك
كل البشر انعطو اذنين تا يسمعوا. ويللي عم يسمعوا قلال. ومن يللي عم يسمعوا قلال يللي عم يفهموا. ومن يللي عم يفهموا قلال يللي عم يعيشوا يللي سمعوه. السالكين صوب الملكوت أقل